Back Adoración d'os Reis Magos AN تمجيد المجوس للطفل يسوع Arabic سجود المجوس ARZ Пакланенне вешчуноў Byelorussian Пакланеньне вешчуноў BE-X-OLD Поклонение на влъхвите Bulgarian অ্যাডোরেশন অব ম্যাজাই Bengali/Bangla Adoració dels Reis Mags Catalan Anbetung der Könige German Adoration of the Magi English
Aanbidding van die konings is die naam wat tradisioneel aan 'n gewilde onderwerp in die Christelike kuns gegee word. Daarin lê sterrekenners uit die Ooste[1] geskenke van goud, wierook en mirre voor die Jesuskind en aanbid Hom nadat hulle Hom gevind het deur die ster van Betlehem te volg. Hulle word dikwels as konings voorgestel, veral in die Weste. In die 1933/'53-vertaling van die Afrikaanse Bybel word hulle "wyse manne" genoem en in die 1983-vertaling "sterrekykers". In Engelse Bybels is hulle bekend as "Magi", "Kings" of "Wise Men".
Die verhaal word in Matteus 2:11-13 in die Bybel vertel:[2] "Hulle het in die huis ingegaan en die Kindjie saam met Maria, sy moeder, gesien, en hulle het gekniel en aan Hom hulde bewys. Daarna het hulle hulle reissakke oopgemaak en vir Hom geskenke uitgehaal: goud, wierook en mirre. En omdat God hulle in 'n droom gewaarsku het om nie na Herodes toe terug te gaan nie, het hulle met 'n ander pad na hulle land toe teruggegaan. Nadat hulle vertrek het, het daar 'n engel van die Here in 'n droom aan Josef verskyn en gesê: 'Staan op, neem die Kindjie en sy moeder en vlug na Egipte toe en bly daar totdat ek jou sê om terug te kom, want Herodes is van plan om die Kindjie te soek en Hom dood te maak.'"
Christelike ikonografie het die verhaal wat kortliks in die tweede hoofstuk van Matteus (Matteus 2:1-11) vertel word, grootliks uitgebrei en benadruk dat Jesus vanaf sy vroegste dae af erken word as die Koning van die aarde. Die toneel is dikwels gebruik om die geboorte van Christus voor te stel, wat een van die onontbeerlikste episodes is in siklusse van die Lewe van die Maagd sowel as die Lewe van Christus.
Op sommige kerkkalenders in die Weste word die gebeurtenis op 6 Januarie gedenk as Driekoningedag (ook genoem "Epifaniefees"). Die Oosters-Ortodokse Kerk gedenk die aanbidding van die wyse manne (of magi) tydens die Fees van die Geboorte van Christus (Kersfees, 25 Desember).