Carl Otto Hager | |
|---|---|
 Carl Otto Hager | |
| Gebore | Carl Otto Hager 16 Oktober 1813 Dresden, Koninkryk Sakse |
| Sterf | 7 Oktober 1898 |
| Nasionaliteit | Duitsland, Suid-Afrika |
| Beroep | Argitek, portretskilder en baanbrekerfotograaf |
| Eggenoot | Cornelia Janssen |
| Kinders | 11 (of sewe) |
| Ouer(s) | Johann Gotthelf Hager en Johanna Rosina Galwitz |
Carl Otto Hager (Dresden, 16 Oktober 1813 – Stellenbosch, 7 Oktober 1898) was 'n Duitse argitek, portretskilder en baanbrekerfotograaf wat veral bekend geraak het in Suid-Afrika vir die ontwerp van talle kerkgeboue van die Nederduitse Gereformeerde Kerk.
Hy was een van die grootste eksponente van die Neogotiese boustyl in Suid-Afrika, maar talle van die kerke wat hy ontwerp het, is intussen gesloop, onder meer dié op Carnarvon, Fraserburg, Willowmore (dit is onseker of hy dit wel ontwerp het), Caledon, Ceres en Heidelberg, Kaap. Van die mooistes wat behoue gebly het, is dié op Stellenbosch, Piketberg, Ladismith, Somerset-Oos en Pearston. Hy het ook kerke in die Vrystaat ontwerp, maar die name daarvan het vergete geraak. Ander noemenswaardige geboue waarvoor hy verantwoordelik was, is die Kweekskool (intussen ingrypend verander) en die neoklassieke Ou Hoofgebou van die universiteit op Stellenbosch.