Raoult se wet

Raoult se wet is van toepassing op vloeistof-damp sisteme wat in ewewig is. Dit bepaal dat die parsiële druk van elke komponent in die dampfase van 'n ideale mengsel van vloeistowwe gelyk is aan die dampdruk van die suiwer komponent vermenigvuldig met die molfraksie in die vloeistoffase.

Vir 'n enkele komponent in 'n ideale oplossing geld die volgende:

${\displaystyle p_{i}=x_{i}p_{i}^{0}}$

Waar twee vlugtige vloeistowwe A en B met mekaar gemeng word om 'n oplossing te vorm, bestaan die dampfase uit albei komponente van die oplossing. Sodra die komponente in die oplossing ewewig bereik het, kan die totale dampdruk van die oplossing bepaal word deur Raoult se wet te kombineer met Dalton se wet van parsiële druk om die volgende te geeː

Dalton se wetː ${\displaystyle P_{totaal}=p_{A}+p_{B}}$         en         ${\displaystyle p_{A}=y_{A}P_{totaal}}$

${\displaystyle P_{totaal}=x_{A}p_{A}^{0}+x_{B}p_{B}^{0}}$

As 'n nie-vlugtige opgeloste stof (dampdruk = 0, baie min/geen verdamping) opgelos word om 'n ideale oplossing te vorm sal die dampdruk van die oplossing laer wees as die suiwer oplosmiddel. Die verlaging in die dampdruk sal direk eweredig wees aan die molfraksie van die opgeloste stof in die oplossing.

${\displaystyle p_{oplossing}=x_{oplosmiddel}p_{oplosmiddel}^{0}}$

In 'n grafiek is die parsiële drukke weer te gee deur twee regte lyne wat van 0 na die waarde van ${\displaystyle P^{\star }}$ loop. Die helling het ook die waarde ${\displaystyle P^{\star }}$. Die totale druk is ook 'n regte lyn wat van ${\displaystyle P_{A}^{\star }}$ na ${\displaystyle P_{B}^{\star }}$ loop. Oplossings wat Raoult se wet gehoorsaam word ideale oplossings genoem. Oplossings is net dan ideaal as die twee komponente baie min in eienskappe van mekaar verskil.