Agathokles von Syrakus

Dr Agathokles (altgriech. Ἀγαθοκλῆς, Agathoklḗs; * 361 v. d. Z. oder 360 v. d. Z. z Thermai, hüte Termini Imerese uf Sizilie; † 289 v. d. Z. z Syrakus) isch vo 316 v. d. Z. aa Tyrann vo Syrakus und vo 305/304 v. d. Z. bis zu sim Dood Köönig vom ene sizilische Riich gsi, won er gründet het. Er het als Offizier aagfange, denn het er Politik mit de Aahänger vo dr Demokratii gmacht. Er isch zum Fäldher gweelt worde und e baar Joor spööter isch er im ene Staatsstreich an d Macht choo; faktisch het er as Tyrann gherrscht, aber formal isch die demokratischi Verfassig in Chraft bliibe. Er het e lange Chrieg gege d Karthager mit vile Verlust gfüert und het fast dr ganz griechisch Däil vo Sizilie und Däil vo Kalabrie in si Gwalt brocht. Noch em Friidesschluss mit de Karthager het er dr Köönigsditel aagnoo. Er het nie ganz Magna Graecia an sich chönne risse und au e Dünastii het er nid chönne gründe wäge Händel in dr Familie. Noch sim Dood si sini Gegner an d Macht choo.