| Dialäkt: Züritüütsch |
Der Aldo Gugolz (* 24. Juni 1963 z Luzèèrn, Bürger vo Züri und Luzèèrn) isch en Schwyzer Reschissöör, Autor, Kameramaa und Filmproduzänt. Bikant woorden isch er mit sym Kinodokumäntaarfilm Rue de Blamage (2017), eme Film über d Lüüt, wo a de Luzèèrner Baselstraass woned oder schaffed. En ganze Schübel Prys hät er mit sym Kinodokumäntaarfilm Kühe auf dem Dach (2020) überchoo. Und de Film Omegäng (2024) isch der eerscht Film überhaupt, wo s drin um s Schwyzertüütsch und d Lüüt, wo mit em Schwyzertüütsch z tue händ, gaat.