Dr Begriff Bannwald bedütet allgemäin e Stück Wald, wo as Ganzes erhaltenswärt isch, oder e spezielli Form drvo.
Im dütschsproochige Ruum wird mit em Usdruck „Bannwald“ allgemäin e Schutzwald bezäichnet (Lawine-, Fälssturz-, Murgang- und Hochwasserschutz), oder e Waldgebiet, wo vom Natur- und Umwältschutz us gschützt oder e Erhooligsruum isch. Forstwirtschaftlig darf er immer no gnützt wärde und bi Schutzwälder isch das sogar usdrücklig erwünscht, bi Kärngebiet vo Naturschutzgebiet isch das aber verbote. S forstlige Sperrgebiet, e Stück Wald, wo nume für e Zit gsperrt isch, isch käi Bannwald. S Schwizer Waldgsetz vo 1874 brucht dr Begriff „Bannwald“ nid, sondern reedet vom Schutzwald.
I de Alpe findt me Bann- oder Schutzwälder vorallem under de Bärgwälder.