Christoph Blocher

De Christoph Blocher (* 11. Oktober 1940 z Schaffhuuse) isch än Schwiizer Unternehmer und Politiker (SVP). Vo 2003 bis 2007 hett er sini Partei als Bundäsrat verträtte. Är isch reformiert, isch verhüratet und het drei Töchtere, en Sohn u 12 Änkle.^[1] Sini Heimatorte si Züri, Meile und Schattehalb im Haslital (Bärner Oberland). Är isch z Laufe bim Rhyfall ufgwachse. Sini schuelischi Usbildig het är mit sächs Jahr Grundschuel agfange und denn no mit drei Jahr Sekundarschuel abgschlosse. Nachder Schuel het är e landwirtschaftlichi Lehr gmacht. Denn het är di Landwirtschhaftlichi Winterschuel z Winterthur gmacht. Nachär het är Matur Typ C im Gymnasium gmacht. Nach der Matur isch är ga Jura studiere. Är isch Mitglied vo dä Zürcher SVP. Und är het d Aktion für äh unabhängigi und neutrali Schwiz (AUNS) gründet. Vor sire politische Karriere isch är ir EMS Chemie i d Rächtsabteilig igstige. 1983 het är Aktiemehrheit vo dere Firma ufkauft. I däm Jahr wo är isch Bundesrat worde, het är d Diräktion vor EMS Chemie sire Tochter übergä. Im Militär isch är Oberscht. Dur sini Ateil a dr EMS Chemie und dur Finanzgschäft mit em Martin Ebner^[2] het dr Blocher e Privatvermöge, wo me uff zwei bis drei Milliarde Schwiizer Franke gschätzt hät (Stand 2009).^[3] Är ghöört drumm zue de riichschte Schwiizer.

Sini politischi Karriere:

• 1974–1977: Mitglid vom Gmeindrat vo Meile
• 1975–1980: Mitglid vom Zürcher Kantonsrat
• 1977–2003: Präsident vor SVP vom Kanton Züri
• 1979–2003: Mitglid vom Nationalrat
• 1986–2003: Präsident vo dr AUNS (Aktion für eine unabhängige und neutrale Schweiz)
• 2003–2007: Bundesrat, Vorsteher vom EJPD
• 31. Dezämber 2007: si letscht Amtstag als Bundesrot, nochdäm er am 12. Dezämber 2007 nid wiidergweelt worde isch.
• 2008–2018: Vizepräsident vo dr SVP Schwiiz^[4]

1. ↑ Werdegang uf blocher.ch abgruefen am 21. März 2019
2. ↑ Wie Blocher mit vollen Taschen aus den Trümmern stieg. Artikel uf woz.ch vom 17. Februar 2011
3. ↑ Vom Bauernsohn zum Milliardär. Artikel uf orf.at abgruefen am 21. März 2019
4. ↑ Blocher zieht sich aus der SVP-Spitze zurück. Artikel uf blick.ch vom 6. März 2018