Die Pest (Camus)

Dä Artikel isch über e Roman vom Albert Camus. Für anderi Bedütige vom Begriff «Pest» lueg doo.

Die Pest (franz. La Peste) isch e Roman vom Albert Camus us em Joor 1947.

S Buech isch im Juni 1947 uusechoo und isch glii e groosse Erfolg gsi. S Wärk isch äine vo de bedütendste Romään vo dr Résistance und vo dr franzöösische Noochchriegslitratuur. Es ghöört zum Allgemäinguet vo dr öiropäische Kultur und isch uf dr ganze Wält berüemt. Bsundrigs z Frankriich ghöört s zur Pflichtlektüre an de Schuele.

Dr Hindergrund vom Wärk si im Camus sini persöönlige Erfaarige – bsundrigs die us em Zwäite Wältchrieg. Die Pest isch e Reflexion us eme distanzierte Blickwinkel über e Widerstand vo de Mensche gege füüsischi und moralischi Zerstöörig. Gliichzitig isch sis Thema e wichdige Bestanddäil vom Camus sinere Filosofii: d Usenandersetzig mit dr Absurdidäät. Wil d Gschicht wie e Drama in fümf Akt iidäilt isch, isch s Wärk vilerorts as Theaterstück ufgfüert worde.