Direkte Demokratie

Dr Begriff diräkti Demokratii (au ummiddelbari Demokratii) bezäichnet e Verfaare und au e politischs Süsteem, wo die stimmberächdigti Bevölkerig vom ene Staatswese („s Volk“) ummiddelbar über politischi Sachfrooge abstimmt. Diräkti Demokratii underschäidet sich eso vo dr representative oder indiräkte Demokratii, wo s Volk Mitgliider vom ene Root weelt, wo denn über d Sachfrooge entschäidet. Wenn Elimänt vo dr diräkte und indiräkte Demokratii kombiniert wärde, schwätzt mä von ere halbdiräkte oder plebiszitäre Demokratii. Die unmittelbarschti Form vo dr direkte Demokratie isch die in wenige Schwiizer Kantön no vorhandeni Landsgmeind oder uuf kommunaler Ebeni d Gmeindsversammlig. Halbdirekt wird in dr Schwiiz mitbeschtimmt durch Gsetzes-Referendum und Volksinitiative uuf Verfassigsänderig.

Es chunnt vor, ass mä a anderi Forme vo dr Bürgerbedäiligung, vo de Informazions- und Akteniisichtsrächt as diräkti Demokratii bezäichnet. Wenn aber d Bürger nid primär s Rächt häi konkreti Beschlüss z fasse, sondern nume, wenn au intensiv, an mögligst vielem chönne mitzwirke, redet mä eender von ere partizipatorische Demokratii.