Dr Franz Hauptvogel, wo am 9. Mai 1872 z Leipzig uf d Wält cho isch und bis am 5. März 1932 gläbt het, isch e düütsche Jurischt und Mundartschriftsteller gsi.
Dr Hauptvogel het z Leipzig s Nikolaigimnasium bsuecht und a dr Uni vo synere Stadt Kunschtgschicht, Volchswirtschaft und Rächt studiert. 1896 het er promoviert. Drno het er am Düütsche Theater z Berlin d Uusbildig zum Schauspiiler und Reschissöör gmacht. Er het z Stettin un z Chemnitz gschaffet, bevor er 1900 zrugg uf Leipzig cho isch, won er am Rychsgricht, dänn am Amtsgricht und uf ere Awaltskanzlei gschaffet het. Sit 1905 isch er sälbständigen Jurischt z Leipzig gsi. Das isch underbroche woorde dur sy Militärdienscht im Eerschte Wältchrieg.
Dr Franz Hauptvogel het Prosawäärch, juristischi Fachliteratur, Gedicht und Theater gschribe. Teils sind syni Wäärch i dr sächsiche Mundart.