Geldwechsler

Gäldwäggsler isch e kaufmännische Bruef wo bekannt isch sit dass d Münze im Alterdum ufchoo si. Wie dr Naame säit, duscht dr Gäldwäggsler für e Brovisioon fremdi Zaaligsmiddel in orts- oder landesüübligs Gäld um. In de Industriistaate si s hützudags Wäggselstuube und Gäldwäggselautomaate, wo sonigi Gschäft mit Chunde mache. D Entwicklig vom Bruef vo de Gäldwäggsler isch äng mit dr Münz- und Gäldgschicht verbunde. E Blüetezit z Öiropa isch s spöötere Middelalter gsi, wo dr Handel wider het afo uflääbe und Münze von e Hufe verschiidene Autoridääte brägt worde si. Allgemäin goot mä drvoo us, ass d Ursprüng vo de modärne Kreditinstitut in deere kaufmännische Däätigkäit lige.