D Isaurier (au Isaurer) si en antike Volksstamm im Süde vo Chläiasie gsi. Iiri Häimet Isaurie isch e Gebirgsland, wo zwüschen em antike Kilikie und Lykaonie lit und e römischi Brovinz, Isauria. In dr Antike si si as Röiber und Chrieger gfürchtet gsi und häi vom spoote 5. Joorhundert in dr oströmische Armee as Soldate Karriere gmacht. Dr Kaiser Leo I. het sä as Geegegwicht zu de gotische Drubbedäil iigsetzt. Wie wichdig die isaurische Drubbe gsi si, gseet mä dra, ass äine vo iire Generääl vom Leo proteschiert und spööter under em Naame Zenon zum Kaiser erhoobe worde isch. Under em Kaiser Anastasios I. si si aber as Machtfaktor usgschaltet worde.
Mä sött dä Volksstamm nit zu verwäggsle mit dr syrische Dünastii, wo vom Kaiser Leo III. gründet worde isch und wo vo 717 bis 802 s Byzantinische Riich regiert het. Si wird vilmol und falsch as Isaurischi Dünastii bezäichnet.