Jehuda ha-Nasi

Dr Jehuda ha-Nasi (hebräisch ‏יהודה הנשיא‎‎), Jehuda I. oder Rabbenu ha Qadosch (‏רבנו הקדוש‎‎, „unsere häilig Rabbi“), im Talmud mäistens nume Rabbi (* ca. 135; † 15. Kislew 217 z Sepphoris/Zippori), isch e wichdige Patriarch und jüüdische Gleerte im Alterdum gsi. Si groosses Verdienst isch die abschliessendi Redakzioon vo dr Mischna. Er isch doorum dr letscht vo de Tannaite.

Über sis Lääbe isch weenig bekannt. Historiker dänke, ass er vo öbbe 150 bis 220 n. d. Z. gläbt het. Si Vater Rabbi Schimon ben Gamaliel II. isch Nasi, was dennzumool die obersti politischi, religiöösi und juristischi Posizioon under de Juude gsi isch, in dr Stadt Uscha in Galiläa gsi, wo dr Jehuda ufgwaggse isch. Noch em Dood vom Vater isch er uf Bet Sche’arim züüglet, und het dört e Synagoge und e Schuel gläitet. Er isch guet uschoo mit dr röömische Verwaltig und isch im Joor 190 zum Nasi ernennt worde. Er het d Redakzioon vo dr Mischna mit dr Zämmefassig vo de wichdigste halachische Ussaage beändet. D Mischna is aber kä Gsetzkodex, sondern spieglet die vorherrschende Mäinige under de Gleerte in dr Akademii und im Grichtshoof mit allne iire Widersprüch.