Joseph von Eichendorff

Dr Joseph Karl Benedikt Freiherr von Eichendorff (* 10. Merz 1788 uf Schloss Lubowitz bi Ratibor, Ooberschlesie; † 26. Novämber 1857 z Neisse, Ooberschlesie) isch e bedütende Lüriker und Schriftsteller vo dr dütsche Romantik gsi. Öbbe 5000 Verdoonige vo sine Wärk si gmacht worde, mee as vo jedem andere dütschsproochige Lüriker. Au as Brosadichder (Aus dem Leben eines Taugenichts) isch er bis hüt nid vergässe.

Im Eichendorff sini idüllische Beschriibige vo dr Natur und vom äifache Lääbe si brägt vo ere äifache Bildligkäit und Wortwaal. Drhinder steckt aber e vilschichtigs Gflächt us metaforischer Sümbolik zur Dütig vo dr Wält, dr Natur und dr Seel, wo sich vom räine Nützligkäitsdänke, wo im Zitalter vo dr industrielle Revoluzion gang und gääb gsi isch, abghoobe het.