| Dialäkt: Undermarkgreflerisch |
D Judit vu Sülchen-Backnang († um 1123 z Bagene) isch d Frau vum Hermann II. gsi, em Markgrof vu Limburg un spetere Markgrof vu Bade.
D Judit vu Bagene isch d Dochter vum Hesso III. (un d Änkeldochter vum 1057 gnännte Grof Hesso II. vu Sülchen) un syyre Frau Gisela vu Bagene, un d Schweschter vum Sigehard vu Wolfsölden, wu ab 1075 di nej Burg Wolfsölden as neje Herrschaftsmittelpunkt vu dr Familie het böue loo. Si het in d Eh di umfangryyche Bsitzige am mittlere Neckar mit em Schwärpunkt Bagene yybrocht, wu s ihrem Mann megli gmacht gha hän, dert e neje Herrschaftsschwärpunkt z bilde.
Dr Markgrof Hermann II. un syy Frau Judit hän anne 1116 as neji Familiegrablegi s Augustiner-Koorherrestift mit dr Stiftschilche St. Pankratius z Bagene grindet, wu si beidi begrabe wore sin.
Us dr Eh mit em Hermann II. vu Bade sin die Chinder fiirigange:
- Hermann († 16. Jänner 1160), isch dr Noofolger vu syym Vater as Markgrof gsi.
- Judit († 1162) ∞ Herzog Ulrich I. vu Kärnte († 1144)