Kanon der Literatur

Im Kanon vo dr Litratuur brobiert mä, die literarische Wärk zämmezfasse, wo dr grösst literarisch Wärt häi. S Konzept isch im 19. Joorhundert us dr Theologii übernoo worde, wo denn e „Kanondebatte“ drüber gfüert het, weeli Teggst us dr religiööse Überliiferig as verbindlig (kanonisch) sötte aagluegt wärde.

Dr Kanon vo dr Litratuur het vor allem im Schuelunderricht und in de Filologie Bedütig as Brüefigsgrundlaag, wil din d Ditel si, wo von ene vorusgsetzt wird, ass mä si kennt. Uf em Buechmäärt und in Diskussioone über allgemäini Themene isch er vo Inträssi, wil din d Büecher si, wo s liichter mache mitzdiskussiere, wenn mä sä glääse het. Wie mä son e Kanon zämmestellt, hangt vom Fach, vom Ort und vo dr Bildig ab, genauso wie d Froog, was son e Kanon genau söll bedüte.