Osama bin Laden

Dr Usāma ibn Muhammad ibn Awad ibn Lādin (* wahrschyns 10. März 1957 z Riad, Saudi-Arabie; † 2. Mai 2011 z Abbottabad^[1], Pakistan), churz as Osama bin Laden (arabisch أسامة بن لادن‎) bekannt, isch de Gründer un Symbolfigur vo de militante islamistische Organisation al-Qaida un spirituäll Oberhaupt vu verschidene dschihadistische Gruppierige, gsii. Er isch en Mitgliid vo de yyflussryche saudi-arabische bin-Laden Familie gsi, un syt 1994 staatelos gsii.

As Mudschahid het dr bin Laden mit dr Unterstitzig vu dr USA gege dr Yymarsch vu dr Sowjetunion z Afghanistan kämpft. Noch em Zweete Golfchrieg het er sich gege syy ehmolige Ferderer gwändet un het anne 1998 in eme Manifescht^[2] dr Kampf gege d USA zur Bflicht vu alle Muslime erklert.

In dr 1990er Johr hän di Verainigte Staate dr Osama bin Laden fir e baar Aaschleg uf US-Yyrichtige verwantwortlig gmacht, wu US-Burger derby um s Läbe chuu sin, z. B. Aaschleg uf d Botschafte z Nairobi un z Daressalam. D USA hän e anne 1999 uf d FBI-Lischt vu dr maischtgsuechte Flichtige^[3] un 2001 uff d Lischt vu dr maischtgsuechte Terroriste gsetzt. Fir d Terroraaschleg am 11. Septämber 2001 het dr Osama bin Laden sälber d Verantwortig ibernuu.^[4] De Osama bin Laden isch eis vo de Hauptziil vum War on Terror gsi, wo syt 2001 unter andrem zue Operatione z Afghanistan, em Irak un wytri Länder gfiert het. Uf Hiiwys zue syym Verblyyb her dr US-Senat im Juli 2007 e Chopfgäld in Hechi vu 50 Millione Dollar uusgsetzt.^[5] Über syn Verblyyb isch einewäg lang nüüt bekannt gsi.

Am 2. Mai 2011 het dr US-Bresidänt Barack Obama in ere Färnsehaasproch verchindet, dr Osama bin Laden sei z Pakistan vu US-Spezialchreft verschosse wore.^[1] Syni Identität isch vum US-Militär deno bstätigt worde un syn Lyynam isch innerhalb vo 24 Stunde uff See bstattet worde^[6][7][8].

1. ↑ ^{1,0 1,1} US-Spezialkräfte töten Osama Bin Laden in: Spiegel Online vum 2. Mai 2011
2. ↑ Änglischi Fassig vum Manifescht vu 1998
3. ↑ FBI – Ten Most Wanted
4. ↑ Em Osama bin Laden syy Videobotschaft vum 29. Oktober 2004 uf Al-Jazeera
5. ↑ tagesschau.de: 50 Millionen US-Dollar für einen Tipp (Site cha nüme abgrüeft wärde; Suche im Webarchiv)[1] [2] Vorlage:Toter Link/www.tagesschau.de.
6. ↑ the CNN Wire Staff. How U.S. forces killed Osama bin Laden , Cable News Network, 2. Abgruefen am May 2, 2011. 
7. ↑ US forces kill Osama bin Laden in Pakistan. MSN.
8. ↑ Robert Burns: report on burial. Modbee.com. Archiviert vom Original am Mai 4, 2011. Abgrüeft am May 2, 2011.