Response (Judentum)

Response (hebr. She'elot uTeshuvot „Frooge und Antworte“, vo lat. responsa „Antworte“) si im Middelalter und in dr Nöizit Frooge vo dr rächtlige Art an e jüdischi halachischi Autoritäät gsi mit em Ziil, e normativi Entschäidig (Psak din) uf d Froog überzchoo.

Sonigi Bschäid, wo zur Findig vo dr Halacha diene, duet mä immer no in „Responsesammlige“ sammle. Vili vo dene Frooge häi e hüpothetische Charakter gha und Rabbiner häi si an bekannti jüdischi Rächtsgleerti gstellt, zum iiri äigeni Uffassig abysichere. Historisch-kritisch aagluegt, cha mä us de Response uf Brobleem und Lääbensumständ vo de Juude in iirer nitjüdische Umwält schliesse. Zum Bischbil behandle Response Beziejige mit nitjüdische Handelspartner oder Aagstellte, wie mä sich Zwangsdaufte gegenüber söll verhalte etc.

E baar Formle und iiri Blatzierig si noch em Goldziher us dr Dradizion vo de islamische Fatwas choo.^[1][2][3]

1. ↑ Encyclopaedia Judaica (Jerusalem 1971), Bd. 9, S.91-105, Artikel Islam
2. ↑ Zeitschrift der Deutschen Morgenländischen Gesellschaft 53/645, 1899, S.645-652
3. ↑ Georg Olms, Hildesheim 1970, Bd. 4, S.224-231: I. Goldziher: Über eine Formel in der jüdischen Responsenlitteratur und in den muhammedanischen Fetwas. In: ZDMG 53