Risalit

Dr Risalit (us italienisch risalto ‚Vorsprung‘, italienisch saltare ‚gumpe‘), au Avantcorps^[1] oder Avant-corps (vo franzöösisch avant corps „vor em Körper“),^[2] isch e Däil vom ene Geböid, wo mäistens uf dr ganze Hööchi us dr Fluchtlinie vom ene Baukörper füürestoot. Es isch e typischs Gstaltigsmiddel vo dr Archidektuur vo dr Rönessans und vom Barock und isch aagwändet worde, zum d Fassaade gliidere. Er chunnt au in andere Epoche vo dr öiropäische Archdektuur vor, bsundrigs im Historismus.

Je noch dr Posizion zum Geböid reedet mä

• vom ene Middelrisalit wenn er in dr Middi vo dr Fassaade stoot,
• vom ene Siterisalit wen er nid in dr MIddi stoot,
• und vom ene Eggerisalit, wenn zwäi Flüügel wo (mäistens) im ene rächte Winkel zuenander stöön, ufenander dräffe.

Je noch dr Funkzioon underschäidet mä

• Iigangsrisalit, wo sich dr Iigang befindet
• Torrisalit, won e Door isch.

1. ↑ Herders Conversations-Lexikon. Freiburg im Brisgau 1854, Band 1, S. 354. (uf zeno.org).
2. ↑ Brockhaus’ Kleines Konversations-Lexikon. 5. Uflaag, Band 1. Leipzig 1911, S. 131. (uf zeno.org).