Romanus (Papst)

Dr Romanus isch im Johr 897 Papscht gsii. Dr gnau Wahldag isch nit bekannt. D Inthronisation het im Augschte 897 stattgfunde, s Änd vum Pontifikat wird uf Novämber 897 datiert. S isch aber nit ganz sicher, eb dr Romanus gstorben– in däm Fall isch er villicht vergiftet wore – oder abgsetzt woren isch – in däm Fall het er wohl as Mench wytergläbt.

D Wahl vum Romanus, wu vorhär Kardinalprieschter vu San Pietro in Vincoli gsii isch, het vor em Hintergrund vu dr Ussenandersetzige um d Rächtmäßigkait vum Pontifikat vum Formosus stattgfunde, wu ihre Hegschtpunkt in dr Lyychesynod im Summer 897 gfunde hän. Dää vu s Romanus’ Amtsvorgänger Stephan VI. durgfiert Schauprozäss het d Aahänger vum Formosus verbitteret, wu wahrschyns d Inthronisation vum Romanus derno bedribe hän.

In syym churze Pontifikat het dr Romanus d Amtshandlige vu syym Vorgänger fir uugiltig erklert. Dr Formosus rehabilitiert het aber erscht em Romanus sy Noofolger, dr Theodor II..