Springerle

Sprengerle (in dr Schwiz Anisbrötli oder Springerli – im fränkische Ruum Eierzucker gnennt) send a Gebäck, wo mr vor dr Weihnachtszeid backt, daß se no z Weihnachte schee woich send.

Für den Doig nemmt mr Oier, Zucker, Mehl ond Hirschhornsalz, daß se au uffganget oder a Fiaßle krieget. Der Doig wird ausgrollt, no wird mit em Model a Bild nuffdruckt, dann doilt mr se ond lässt se en Dag otrockne. No schtreicht mr awengle Wasser über d Onterseit ond backt se.

Zwische November ond em nuie Johr fendet all Johr a Ausstellong mit em Thema Sprengerle em Museum em Schlessle in Freiberg am Neckar statt.

Em elsässischa Lítzelstoi geit s a Sprengerles-Museum. En dr Stadt Strasburg, Pennsylvania (USA) geit s a „Springerle-House“, a klois Cafe mit ere Model-Sammlong.