| Chrischona | ||
|---|---|---|
 D Siidlig St. Chrischona vom Färnseedurm us gsee | ||
| Hechi | 522 m ü. M. | |
| Lag | Kanton Basel-Stadt, Schwiiz | |
| Gebirg | Dinggelbärg | |
| Geografischi Lag | 618195 / 269185 | |
| ||
| Dialäkt: Baseldütsch |
Dr Chrischona isch e Bärg im Kanton Basel-Stadt und die westligsti und dritthöggsti Erheebig vom Dinggelbärg. Er lit in dr Gmäind Bettige an dr Gränze zu Dütschland. Dr höggst Punkt lit uf 522 m ü. M. Vo doo us het mä bi klaarem Wätter e gueti Ussicht uf die Oberrhiinischi Diefebeni mit dr Agglomerazioon Baasel, d Jurachettene und d Alpe vo dr Jungfrau bis zum Säntis.
Dr Bärg bestoot us Schichte vo Keuper und Muschlechalch us dr Trias vor 210 Millioone Joor, dr Spitz isch us dr Zit vom Jura vor 170 Millioone Joor. D Kwelle uf dr südlige Site vom Chrischona entspringe in dr Keuperschicht. Dr Rustelbach nimmt s Wasser vo fast alle Kwelle uf und het dr Keuper abdräit bis uf e Muschlechalch.[1]
Uf em Bärg stoot d St. Chrischona Chille und dr Färnseedurm St. Chrischona, wo 250 Meter hooch isch und wo mä vo witem cha gsee. Uf em Spitz vom Bärg isch e Restorant.
- ↑ Biogeografische Lehrpfade: Quellen in der Region Basel, abgrüeft am 3. Jänner 2013