Wakkerpreis

Dr Wakkerbriis isch e Briis, wo dr Schwizer Häimetschutz (SHS) politische Gmäinde in dr Schwiz git für e bischbilhafte Ortsbildschutz. Dr Briis wird sit 1972 äimol im Joor vergee und isch mit 20'000 Franke dotiert. Si Naame het er vom Gschäftsmaa Henri-Louis Wakker, wo im Häimetschutz e Däil vo sim Vermöge vermacht het.

Am Aafang si vor allem Gmäinde geert worde, wo bsundrigi Aasträngige gmacht häi, zum historisch gwaggsnigi Ortskärn und Altstedt z erhalte. In letschter Zit wärde aber au Gmäinde geert, wo iir Ortsbild under eme bestimmte aktuelle Gsichtspunkt witerentwiggle und ufwärte. Das cha zum Bischbil d Nöinutzig vo alte Industriibaute oder e glungnigi Verchnüpfig vo alter und nöier Bausubstanz si.

Zum 100-Joor-Jubileum vom Schwizer Häimetschutz het mä dr Briis im Joor 2005 usnaamswiis nit ere politische Gmäind sondern de Schwizerische Bundesbaane (SBB) gee.^[1]

1. ↑ Der Schweizer Heimatschutz verleiht der SBB den Wakkerpreis 2005 Mediemitteilig uf wakkerpreis.ch vom 20. August 2005 (PDF-Datei; 104 kB)