Walther von der Vogelweide

Dr Walther vo dr Vogelwäid (* um 1170, Geburtsort umbekannt; † um 1230, möögligerwiis z Würzburg) gältet as dr bedütendsti dütschsproochigi Lüriker im Middelalter. Vo iim si 500 Stroofe in über 110 Döön bzw. – inhaltlig grubbiert – 90 Lieder (Minnelieder) und 150 Sangsprüch überliiferet; usserdäm e religiöse Liich (wo, je nochdäm weli Fassig mä interpretiert, e Dreifaltigkäits- oder e Marieliich isch). D Überliiferig vom Walther sine Wärk isch näbe dere vom Neidhart und vom Frauelob sine die umfangriichsti vom dütsche Middelalter.

Scho im 13. Joorhundert het er zu de allererste Vorbilder ghöört, spööter zu de zwölf alte Mäister vo de Mäistersinger. Die ersti modärni Usgoob vo sine Wärk stammt vom Karl Lachmann (1827). Wemm mä uf Gedicht vom Walther verwiist, brucht mä immer d Site und Ziile in dere Usgoob.^[1]

1. ↑ Zum Bischbil: L 3,1 = s Gedicht, wo im Lachmann sinere Usgoob uf Site 3, Ziile 1 afoot; das weer dr Liich