Wladimir Wladimirowitsch Putin

Wladimir Wladimirowitsch Putin (russisch Владимир Владимирович Путин, Ussprach [vɫɐˈdʲimʲɪr vɫɐˈdʲimʲɪrəvʲɪtɕ ˈputʲɪn] aalose^ⓘ/?; * 7. Oktober 1952 z Leningrad, Sowjetunion) isch en russische Politiker. Er isch sit em 7. Mai 2012 Präsidänt vo de Russische Föderation, vo 2000 bis 2008 isch er scho mol Präsident gsi. Vo 1999 bis 2000 und wider vom Mai 2008 bis Mai 2012 isch dr Putin Ministerpräsidänt ksi. Dodevor hät er bim sowjetische Gheimdienst KGB gschaffet.

Am Afang hät mer Hoffnige ghaa, de Putin seg en Erneuerer. Sini Innepolitik isch aber gägenüber de Mäntschen und de Medie je lenger desto repressiver worde. Sini illiberali politischi Ideogie nännt mer Putinismus. Hüt (2022) isch Russland faktisch e Diktatur, wil mer für alles, was me gägen in und sini Politik säit, is Gfängnis chunt oder aber e saftigi Buess muess zale. Freii Medie gits im Land nüme.

Trotz em Georgiechrieg vo 2008 het er sech ersch nach dr Annexion vo de Halbinsle Krim 2014 vom Weste distanziert, wenn o nume teilwiis. Im Februar 2022 hät er en brutalen Agriffschrieg gäge d Ukraine agfange – und hät dademit es Tabu proche, wo sit em Zwäite Wältchrieg ggulte gha hät. Drufabe het dr Weschte Sanktione über Russland verhänkt.