Xi Jinping

Xi Jinping (chinesisch 习近平 oder 習近平 Xí Jìnpíng, IPA: [ɕǐ d̥ʑ̥înpʰǐŋ]; * 15. Juni 1953 z Fuping, Shaanxi, Volksrepublik China) isch e Politiker in dr Volksrepublik China. Er isch dr Generalsekretäär vo dr Kommunistische Bardei vo China und dr Vorsitzendi vo dr Zentrale Milidäärkommission.^[1] Sit em Merz 2013 isch er dr chinesisch Staatsbresidänt.^[2] Am 14. Novämber 2012 isch dr Xi Jinping uf em 18. Bardeidaag in s Zentralkommitee vo dr Kommunistische Bardei vo China gweelt worde,^[3] am 15. Novämber zum Generalsekretäär. D Waale 2012 häi die fümfti Füerigsgenerazioon vo dr Volksrepublik China an d Macht brocht.^[4]

In dr Politikwüsseschaft wird er vilmol as drzitig „überraagend Füerer“ (Paramount Leader) vom Land aagluegt. Zum innerste Zirkel vo dr Füerig vom Land ghööre usser iim no die säggs andere Mitgliider vom Ständige Usschuss vom Politbüro vo dr Kommunistische Bardei vo China.^[5]

De Xi het d Reformbolitik vo siine Vorgänger wie em Hu Jintao zu grosse Täil zrugggddrääit und verfolgt e stercheri „patriotischi“ Ideologisierig.^[6] Siini Innen- und Ussebolitik isch aggressiiv; er überwacht d Iiwooner vom äigete Land, goot repressiiv gääge Minderhäite wie d Uigure voor, het d Autonomii vo Hongkong uusgheeblet, droot Taiwan, wott s ganz Südchinesisch Meer für China haa und brobiert überall uf dr Wält Iifluss z nee.

1. ↑ Xi Jinping neuer Parteichef Chinas. SF Tagesschau, 15. Novämber 2012
2. ↑ «Volkskongress: Xi Jinping ist neuer Präsident Chinas» bi Spiegel Onläin, 14. Merz 2013 (abgrüeft am 14. Merz 2013).
3. ↑ Chinas Kommunisten läuten Machtwechsel ein. NZZ.ch, 14. Novämber 2012
4. ↑ Bericht auf welt.de vom 15. Novämber 2012, abgrüeft am 25. 11.2012
5. ↑ Bericht auf faz.net vom 15. Novämber 2012, abgrüeft am 15.11.2012
6. ↑ Die Ideologen sind zurück, Artikel i dr Zeit.