Carnicero

Un carnicero^[1] u carnicer^[1] (u una carnicera^[1] si ye muller) ye una persona que tien como oficio sacrificar (no toz os carnicers lo fan) y vender a carne de bestiar.^[2] Ya en todas as ciudaz d'a Baixa Edat meya viviban cuantos carnicers.

O carnicero treballa por un regular en os establimientos ditos carnecerías. As carnecerías pueden estar establimientos individuals, pueden estar integradas en un mercau o simplament constituyir una sección en un supermercau u hipermercau.

A primera actividat que reyaliza o carnicero ye a selección d'a pieza a vender mirando que tienga o millor aspecto posible y que pueda aproveitar-la a o maximo. Una d'as prencipals fainas d'o suyo oficio consiste en o preparo d'a carne en os pesos, formas y cantidaz en que va a estar mesa a la venda u en que le siga demandada por o comprador. Pa ello, esgosa a pieza, retalla as partis malas y talla a carne en chullas con o cutiello seguntes a cantidat requiesta por o client; capola a carne con a capoladora pa vender-la a o peso u pa fabricar con ella mondonguillas u hamburguesas; talla o pernil y atros embutius en chullas con a talladora electrica u desepara as costiellas d'a costellada con a estral de carnicer.^[3]

O carnicero tamién aconsella a o client sobre a carne que s'adapta mas a las suyas necesidaz u presupuesto. Antimás pesa y embolica o producto u envasa a o vueito as piezas si asinas lo demanda o comprador.

1. ↑ ^{1,0 1,1 1,2} (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
2. ↑ (en) Definición d'o Diccionario de Merriam-Webster de "carnicer"
3. ↑ (en) Descripción d'o puesto de treballo d'o carnicer