La Infortunada

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

La Infortunada Lafortunada
Lugar d'Aragón
La Infortunada dende a puyada de Badaín.
Entidat  • País  • Provincia  • Comarca  • Municipio	Lugar  Aragón  Uesca Sobrarbe Tella-Sin
Partiu chudicial	Boltanya
Población  • Total	109 hab. (2018)
Altaria  • Meyana	713 m.
Distancia  • 135 km  • 19,5 km	enta Uesca enta l'Aínsa
Codigo postal	22364
Parroquial  • Diocesi  • Arcipestrau	Balbastro-Monzón Sobrarbe-Ribagorza
Coordenadas	42°32’36’’N 0°11’48’’E
La Infortunada La Infortunada en Aragón

La Infortunada^[1][2] (/lajn.for.tu.'na.da/), La Enfortunada^[3] (/lan.for.tu.'na.da/) u L'Enfortunada^[4] (/len.for.tu.'na.da/) (oficialment y en castellano «Lafortunada»), ye un lugar aragonés d'o municipio de Tella-Sin, en a provincia de Uesca y comarca de Sobrarbe. A suya población ye de 109 habitants (2018).^[5]

En l'actualidat, o nuclio de La Infortunada ye lo mas poblau d'o municipio de Tella-Sin, d'el que actúa como cabecera municipal. En A Infortunada se troba la Casa d'a Villa y bels equipamientos municipals, como a escuela municipal d'Educación Primaria (tancada dende o curso escolar 2008-2009^[6]), o Centro de Salut y o Museu d'a Electricidat. La Infortunada ye un nuclio fincau en a ladera d'a carretera A-138 de l'Aínsa ta Bielsa, en a ribera d'a Cinca, con una economía dedicada a lo sector d'os servicios (hostelería, restauración) per lo que concentra una población important de treballadors foranos.

No s'ha puesto dar treslau d'a presencia de La Infortunada d'en antes d'a segunda mitat d'o sieglo XVIII, en fendo-la un d'os nuclios mas chóvens de Sobrarbe, posiblement naixida como un barrio de Badaín (que dista poquez cientos de metros) debaixo d'él en o canto d'o río. Dos casas el composaban dica la primer ventena d'anyos d'o sieglo XX, Casa Tomás y Casa Cuadrado, totas dos de grans dimensions que heban servido ta fonda y hespital en a ribera d'a Cinca dica l'arribada d'as obras hidraulicas.

A gran transformación de La Infortunada arribó con os intereses d'a empresa basca «La Ibérica» (dimpués «Iberduero», y en l'actualidat «Iberdrola»), que escomenzó as obras de construcción d'a Central hidroelectrica de La Infortunada sobre lo río Cinca en 1919,^[1] dentrando en funcionamiento la primer parte l'1 de chiner de 1923.^[7] Con a instalación de la dita central, que ha gosau estar a industria que ha dau la vida a la localidat en cuasi tot lo sieglo XX, a estructura de La Infortunada cambeó radicalment, disenyando-se la población nueva de tot, que ye como se conoix en l'actualidat, a la moda d'una colonia industrial con gran cantidat de treballadors foranos (primer ta las obras, dimpués ta las fayenas d'a central). Muitos d'os edificios d'uso comunal que i existen (como a ilesia parroquial, o museu u la Casa d'a Villa) en primeras yeran propiedat d'a Companyía, y se i contruyoron ta dar-le servicio a la colonia de treballadors que i vivivan. A central de La Infortunada produce una potencia total de 83.000 KWh,^[7] per lo que ye la mas important de tot lo Pireneu de Uesca.^[7]

En a Cinca per debaixo de La Infortunada, a bel kilometro en dirección ta l'Aínsa, existe un entibo de mida redueita, que ha nombre oficial de Entibo de La Espunya («Embalse de Laspuña») perque s'emplega ta canalizar l'augua que alimenta la central de La Espunya, pero que en a comarca se conoix popularment como «Embalse de La Infortunada».^[1]

1. ↑ ^{1,0 1,1 1,2} (es) LASAOSA SUSÍN, Ramón et ORTEGA MARTÍNEZ, Miguel, Miradas desde Tella; Ayuntamiento de Tella-Sin + Mancomunidad del Valle de Gistaín + Ediciones Imago. Zaragoza, 2003. ISBN 978-84-88518-61-7
2. ↑ (an) GALICIA, André, Chunto á o fogaril aragonés; Xordica Editorial. Zaragoza, 2000. ISBN 978-5488920-26-1
3. ↑ (es) LOZANO SIERRA, Chabier. Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico. 2010.
4. ↑ (es) Apéndiz Topónimos:Pueblos con nombre local en aragonés d'a Gran Enciclopedia Aragonesa online, consultada lo 16 d'octubre de 2010.
5. ↑ (es) «Lafortunada» en a subpachina «Relación de unidades poblacionales» d'o Instituto Nacional de Estadística, consultada o 17 d'octubre de 2010.
6. ↑ (es) Noticia en l'Heraldo de Aragón de 4 de setiembre de 2008, consultada lo 17 d'octubre de 2010.
7. ↑ ^{7,0 7,1 7,2} (es) Dentrada Lafortunada en a Gran Enciclopedia Aragonesa online, consultada lo 17 d'octubre de 2010.