Tetra (peix)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Tetra
Un tetra emperador (Nematobrycon palmeri) y cualques tetras neón (Paracheirodon innesi) de fundo. Totas dos, especies suramericanas.
Clasificación scientifica
Dominio: Eukaryota Reino: Animalia Filo: Chordata Subfilo: Vertebrata Clase: Actinopterygii Orden: Characiformes Familia: Alestiidae Characidae Lebiasinidae
Nomenclatura binominal
Tetra
Linnaeus, 1758

Iste articlo trata sobre os peixes Tetra. Ta altros usos d'o termino «tetra» se veiga Tetra.

Tetra ye una denominación popular ta bellas especies de peixes d'augua dolza, de mida chiqueta, orichinarias de latitutz tropicals y subtropicals d'o mundo, especialment d'America Central y d'o Sud, anque bi n'ha tamién que dimanan d'altros continents, como lo sud-este asiatico y d'as cuencas d'os grans ríos d'Africa. «Tetra» ye un caso de denominación polifiletica, en a que se i concaben especies de muitos cheneros diferents, y dica de diferents familias zoolochicas, y lo suyo emplego se lemita, sobretot, en l'ambito de l'acuaricultura y acuariofilia, en estando un termino que careix totalment de garra valor taxonomica.

Os peixes ditos «tetra» solen compartir cualques carateristicas que son as que fan que os afeccionatos troben consenso en dar-les ixa denominación popular. Tienen o cuerpo comprimito lateralment, con aletas caudal, dorsal y anal unicas, dos aletas ventrals y dos pectorals. A boca la i tienen frontal (a diferencia d'as especies d'a orden Cyprinodontiformes -guppys, mollys, ...-, tamién populars en acuariofilia, que la i tienen superior) pos capturan l'alimento que flota en l'augua a meya altaria, mostrando-se bien cautelosos por instinto cuan el capturan en a superficie y careixendo d'a tendencia que tienen os Cyprinidae (carpas) ta exforicar en o fundo ta buscar-lo, recullendo-lo a lo mas cuan se troba reposau en bella superficie. Bellas especies, concretament as que perteneixen en a familia Characidae con a sola excepción d'as especies miembros d'o chenero Nematobrycon, a demés tienen una aleta adiposa.

D'alcuerdo con bels autors, a denominación «tetra», que ye un radical lexico que en griego significa «cuatre», dimana d'as cuatre aletas unicas que tienen os miembros d'a familia Characidae: caudal, dorsal, anal y adiposa (Characidae ye a familia que mes gran numer d'especies cautivables tiene). Alavez, a denominación s'habría feito posteriorment extensiva a totas as especies que se pareixen tamién d'ista familia concreta de peixes, sin que fuese preciso que perteneixesen en os Characidae u nian que tenesen l'aleta adiposa que ye carateristica d'ixa familia taxonomica.