Back الميل الأخضر (فيلم) Arabic الميل الاخضر ARZ The Green Mile (película) AST Yaşıl mil (film, 1999) Azerbaijani Зялёная міля (фільм) Byelorussian Зеленият път (филм) Bulgarian দ্য গ্রিন মাইল (চলচ্চিত্র) Bengali/Bangla La milla verda Catalan Zelená míle (film) Czech Симĕс миля (фильм) CV
- Iste articlo ye sobre una cinta de cine de drama fantastico policiaco de cine estausunidense de l'anyo 1999; ta atros usos, se veiga The Green Mile.
The Green Mile (títol orichinal en anglés, en aragonés A milla verda, enguerada en Aragón con o suyo títol traduciu enta lo castellano como La milla verde) ye una cinta de cine estausunidense de cine de drama fantastico policiaco enguerada l'anyo 1999 dirichida por Frank Darabont seguntes un guión adaptau por él mesmo (basau en a novela The Green Mile que heba publicau Stephen King en 1996), con una banda sonora orichinal de Thomas Newman, una dirección de fotografía de David Tattersall, una producción cinematografica de Frank Darabont y David Valdes ta las productoras Castle Rock Entertainment y Darkwoods Productions y un elenco formau por Tom Hanks, Dabbs Greer, David Morse, Bonnie Hunt, Michael Clarke Duncan, James Cromwell, Michael Jeter, Graham Greene, Doug Hutchison, Sam Rockwell, Barry Pepper, Jeffrey DeMunn, Bill McKinney, Patricia Clarkson, Harry Dean Stanton, Eve Brent, William Sadler, Paula Malcomson, Brent Briscoe y Gary Sinise, entre d'atros actors.
Paul Edgecomb ye veyendo en l'anyo 1999 la cinta Top Hat y prencipia a plorar, explicando a su parella Elaine que lo fa en remerar os escaicimientos que presenció en 1935 cuan yera oficial en a garchola de Cold Mountain, en cosirando lo corredor d'a muerte. Lo suyo treballo yera de supervisar a d'atros guardias, en destacando por a suya crueleza Percy Wetmore, que plega a crebar os didos d'un presonero y que fa servir as suyas conexions politicas ta evitar estar castigau. Entre los presoneros se troba John Coffey, un hombre afroamericano acusau d'a violación y asasinato de dos ninas de raza blanca. Eduard "Del" Delacroix ye obchecto de mals tractos por parte de Percy, que plega a matar a su ratón mascota. Tanimientres, Coffey lo consigue resucitar y, amás, cura una greu infección d'a vuixiga urinaria de Paul, y iste prencipia a tener dandalos de que sía culpable. Percy demana estar él qui execute a Del, y se li concede a cambio de que accepte marchar a treballar en un atro puesto, y en a execución maniobra ta provocar lo mayor dolor posible, y Coffey siente él mesmo ixe dolor. Os atros guardians lo castigan a la suya manera, en obligando-lo a usar una camisa de fuerza, a la vegada que aproveitar ta sacar clandestinament a Coffey d'a garchola ta que cure a la muller de l'alcaide, Melinda, d'un greu tumor cerebral terminal. En tornar en a garchola, Coffey consigue transferir o mal de Melinda enta Percy, qui enrabiau mata a un presonero. Alabez Coffey explica que ixe presonero yera qui realment yera lo culpable d'o crimen contra las dos ninas por o que él ye condenau, pero que demana igualment estar executau porque la muerte será ta él una liberación en estar incapable d'absorber toda la maldat d'o mundo.
The Green Mile s'ambienta en Loisiana en 1935 y 1999 y las suyas escenas se filmoron en College Grove, Columbia, Lewisburg, Nashville, Shelbyville y atros puestos de Tennessee y en Blowing Rock y atros puestos de Carolina d'o Norte, amás d'en os Samuel Goldwyn Studios en West Hollywood en California.[2]
Se tracta d'una cinta que ha recibiu cuantos premios y nominacions, entre los cuals destacan cuatre nominacions a los Premios Oscar en a suya 72ena edición (Millor Cinta, Millor Actor Segundario, Millor Guión Adaptau y Millor Soniu) y una nominación a los Premios Globos d'Oro en a suya 57ena edición (Millor Actor Segundario).