Beatnik

Beatnik ye un términu inventáu en 1958 pol periodista d'Estaos Xuníos Herb Caen col fin de parodiar y referise despectivamente a la xeneración beat y los sos seguidores, malpenes meses depués de que se publicara Nel camín (On the Road), la novela-manifiestu del movimientu escrita por Jack Kerouac. Los escritores beat refugaron el términu por despectivu, ensin embargo el mesmu foi adoptáu y espardíu ampliamente polos medios de comunicación, aplicándolu a un estereotipu mozu distinguible pola forma de vestise y arreglase que se fizo moda, y relacionándolo con una actitú proclive a la folgancia, el desenfrenu sexual, la violencia, el vandalismu y les pandilles de delincuentes. Col tiempu la denominación terminó siendo aplicada de manera indiscriminada, tanto al estereotipu, como a los artistes de la xeneración beat y los sos seguidores. Los beats y los beatniks diluyéronse na segunda metá de la década de los sesenta, inmersos nos movimientos contraculturales como los encarnaos polos hippies, el rock, la revolución sexual y les lluches antirracistes y escontra la guerra de Vietnam. Fuera d'Estaos Xuníos, dambos términos "beat" y "beatnik" fueron utilizaos como sinónimos, ensin percibir el sentíu paródicu del segundu.