Coordenaes: 21h 1m 17.468s, -32° 15′ 27.828″
Gamma Microscopii (γ Mic / HD 199951 / HR 8039) ye la estrella más brillosa na constelación de Microscopium con magnitú aparente +4,67. Asitiada a 223 años lluz del Sistema Solar, ye miembru de la corriente d'estrelles de l'Asociación estelar del sietestrellu.
Gamma Microscopii ye una xigante mariella de tipu espectral G4III con una temperatura superficial de 5100 K. La so lluminosidá ye 64 vegaes mayor que la del Sol y el so radiu ye 10 vegaes más grande que'l d'ésti. Les sos carauterístiques son entemedies ente los dos componentes que formen la estrella binaria Capella (α Aurigae); coles mesmes ye daqué más caliente pero claramente menos lluminosa que α Microscopii, tamién una xigante mariella. Con una edá de 620 millones d'años, empezó la so vida na secuencia principal como una estrella blancu-azulada de tipu B9.
Allónxase de nós a 15 km/s, los astrónomos atoparon que fai 3,8 millones d'años Gamma Microscopii pasó a namái 6 años lluz de distancia la Tierra, siendo naquel momentu la estrella más brillosa nel nuesu firmamentu con magnitú -3.
Una estrella tenue de magnitú 14 a 25,7 segundos d'arcu probablemente nun ye una compañera real, sinón que forma una doble óptica con Gamma Microscopii.