Micorriza

Una micorriza (del griegu: mycorrhiza «fungu y raigañu»),^[1]  ye una rellación simbiótica (xeneralmente del tipu mutualística , pero dacuando feblemente patoxénica) que s'establez ente un fungu y los raigaños de les plantes vasculares. Nel 95% de les plantes que s'estudiaron atopóse esta simbiosis.  Una esceición son les plantes de la familia de la berza^[2] (brasicacies). L'asociación de les micorrices coles plantes ta presente dende fai 400 millones d'años

Nuna asociación con micorrices los fungos colonicen los raigaños de plantes güéspede, yá sía de forma intracelular como asocede nos llamaos fungos micorrizíticos arbusculares (AMF arbuscular mycorrhizal fungi), o estracelularmente nos llamaos fungos ectomicorrizíticos. Les micorrices son un componente importante na vida y la química del suelu .

La mayoría de cogordes comestibles de los montes de pinos (robeyón^[3],llezneru^[4], Cantharellus cibarius, Tricholoma terreum) son esporocarpes de fungos micorrízicos. Toos estos fungos viven coneutaos a los árboles vivos, y dambos llogren beneficiu d'esa simbiosis. Delles plantes son micorrizaes artificialmente yá sía pa llograr cogordes comestibles (turmes por casu) o p'ameyorar la so crecedera ensin precisar abonos químicos (especialmente utilícense fungos del xéneru Glomus). Les micorrices amonten la resistencia de les plantes a les enfermedaes provenientes del suelu y dexen que les plantes colonicen tierres ermes.

1. ↑ AB Frank (1885) Über die auf Würzelsymbiose beruhende Ehrnährung gewisser Bäum durch unterirdische Pilze. Berichte der Deutschen Botanischen Gesellschaft 3, 128-145.
2. ↑ Nomenclátor de los seres vivos en llingua asturiana, Sabencia - Sociedá Asturiana de les Ciencies. Consulta on-line: Brassica%20oleracea%20var%20sylvestris
3. ↑ Nomenclátor de los seres vivos en llingua asturiana, Sabencia - Sociedá Asturiana de les Ciencies. Consulta on-line: Lactarius%20sanguifluus
4. ↑ Nomenclátor de los seres vivos en llingua asturiana, Sabencia - Sociedá Asturiana de les Ciencies. Consulta on-line: Hygrophorus%20gliocyclus