Coordenaes: 5h 18m 14.357s, -69° 15′ 1.148″
S Doradus (S Dor / HD 35343 / CD-69 295)[9] ye una estrella variable na constelación austral de Doráu, prototipu d'una clase de variables que lleven el so nome, variables S Doradus o variables azules lluminoses. Nun pertenez a nuesa galaxa, la Vía Lláctea, sinón al cúmulu abiertu NGC 1910 na Gran Nube de Magallanes y alcuéntrase a unos 180.000 años lluz de distancia del Sistema Solar.[10]
Con una magnitú absoluta que puede llegar a -10 y una lluminosidá de más de 1 millón de soles, S Doradus ye una estrella hiperxigante y una de les más lluminoses que se conocen. Sicasí, la gran distancia que nos dixebra d'ella fai que sía invisible a simple vista. La so magnitú aparente varia ente +8,6 y +11,7, con variaciones de rellumu lentes y de llarga duración, chiscaes por españíos ocasionales. La so temperatura superficial ye menor que la d'otres variables azules lluminoses, pero'l so diámetru ye mayor.[11]
El so espectru ye similar al de la estrella P Cygni, variable del mesmu tipu. Estes estrelles son bien masives, siquier 60 vegaes más que'l Sol, y la so vida nun puede entepasar unos pocos millones d'años.[12] Estudios del añu 1999 amuesen qu'agora l'espectru de S Doradus ye similar al d'una estrella superxigante de tipu espectral F, daqué que nun se reparó nos 50 años anteriores, anque en numberoses ocasiones la estrella tuvo'l mesmu rellumu. Desconozse la causa d'esti cambéu.[13]