Sanahin

Sanahin tucpastaxe ( armenavon Սանահին ), tir armenafe tucpastaxe tigise koe Haghpat wida ke Lori winka valentrone Xayastana.

Haghpat tucpastaxe isu Sanahin wetce arayaf debak ke tamavafa gadakiewega ke UNESCO bak 1996 belcon zo bendeyed.

Sanahin yolt vas « tele losavsafe » sugdalackar, ape kapbure Haghpat vegungafe tucpastaxe. Bate toloye tucpastaxe tid jonkiron oltavackafe ise rowinon gu sint tigid, moe giatenafa azekexa vox solparsanafe gu vostapa ke kuksama konisa va Debed.

Konkase Sanahin moe debak ke abdikristevafa dopewa zo kolnayar, voxen vuestexa ke yona losavsafa uja ke IV^-eafa ok V^-eafa decemda dere krulded. Tucpastaxe bak 966 sareon gu Bagratuni prostelay zo zabduyur. Tiyir zolonapafe gu araya kiren ayopaf opeem is selaropa is aryona opa deneon zo taveyed. Vas nevaxo is sutexo ruldayar lizu jontika neva zo epuyud, don jontik olkoy yunkeyen gu pinoba.

Pona ke tucpastaxo tir dem konake xe kolnayane bak amidafe sare : Surp Astvatsatsin dem kuskot isu Amenaprkich is Surp Grigor amuda is cultim is nevaxo is rasekbiot.