Falco

Da Falco (omtlich Johann „Hansi“ Hölzel; * 19. Feba 1957 in Wean; † 6. Feba 1998 bei Puerto Plata in da Dominikanischen Republik) woa a österreichischa Musika. Er güüt ois „da easchte weiße Rapper“.^[1] Sei Liad Rock Me Amadeus hod ois easchte und bis jetzt anzige deitschsprochige Numma de Spitzn vo de US-Billboard-Charts erreicht. Scho zu seine Lebzeitn san rund 60 Müllionen^[2] Tondräga vo seine Liadln vadraht wuan.

Scho in seina Kindheit hom olle gmaant, dassa a ausagwenlichs Gspia fia de Musik häd. Wia'ra zum Bassklompfnspün angfangan hot, hot a scho in vüle Kapön zupft, wia zum Beispü bei da "Hallucination Company", bei de Drahdiwaberl oda bei de "Spinning Wheel". Entdeckt is da Falco dann vom Markus Spiegel wurn, dem wos aa a Plottnlabel (des owan de "GIG Records") gheat hot. Da Robert Ponger hot de Musik zu "Der Kommissar" gschriem, da Falco den Text und späta ist des daun a Wödhitt wuan. Siem Millionen Moj is a vakauft wurn. 1985 is da Falco mit "Rock me Amadeus" sogor Numma Aans in de ameriganischen Charts gwesn, ois bis heit aanziga mit am deitschsprochign Liad (oba des homma eh scho fuahea gsogt). Noch dem Eafoig is a oba in a Grise kuma. Erscht 1992 hod a de ibawundn ghobt. Kuaz voam Erscheinen vo da Plottn "Out of the Dark" hot a oba bei aan Autounfoi in da Dominikanischen Republik de Potschn gschtreckt. A Bsundaheit vom Falco woa, dass a in sein Gsangl in Text auf Weanarisch, Hochdeitsch und Englisch gmocht hod, oba a Italenisch (Junge Röma), Fraunzesisch (Kamikaze Kappa), Oidgrichisch (Neo Nothing), manchmoi sogoa vamischt.

1. ↑ Ach, Amadeus! (HTML) Tagesspiegel, 5. Juni 2008, abgerufen am 7. Juli 2008 (deutsch, Portrait zu Falco). 
   Falco wird zum Weltstar. (HTML) Nachlassverwaltung, archiviert vom Original [1] am 24. Septemba 2008; abgerufen am 7. Juli 2008 (deutsch): „[…]Es san net nua seine genialen Text, a Mischung aus Hochdeitsch, Weanarisch und Englisch, es is net nua sei von ihm entwickelte Kunstsproch, sondern es is vor oim a sei eigane Oart zu singan, womit er der erste weiße Rapper wird.[…]“ 
2. ↑ Matthias Reichel: Einzelhaft: 25th Anniversary Edition. (HTML) CDstarts.de, Juni 2007, abgerufen am 7. Juli 2008 (deutsch).