Frittatnsuppn

Frittatnsuppn, aa Pfannakuachasuppn oda Oakuachasuppn, is a Suppn in de wos obkuihde, in Stroafn gschnittene, mid Muskat und Soiz herzhaft gwiazte Palatschinken ois Einlog vawendt wern.

Moastns nimmt ma a kräftige, klaare und recht hoasse Rindssuppn, de wo ma iwa de zeascht ins Della glegtn Fritattnstroafn giasst und dann mit Schnilla oda Bedasui garniat. De Frittatnsuppn ghead zu de estreichischn Nationalspeisn, is awa aa in olle boarisch- und alemannischsprochigen Regiona sehr beliabt. Z alemannisch hoassts nacha Flädlesuppe oda Flädlisuppe.