Rupert vo Soizburg

Da heilige Rupert vo Soizburg (* umara 650, vamuatli z Worms; † vamuatli 27. Meaz 718 z Worms) oda Rupert von Salzburg und Sankt Ruperti (aa Ruprecht, Hrodpreht etc.) woa Bischof vo Worms und Soizburg. Ea wead Apostl vo de Baiern gnennt.

Da Heilige Ruperti kimp ausm Merowinga Houchodl ausm Gschlecht vo de westfrängischn Robertina und is Bischof vo Worms woan. Da boarische Herzog Theodo II hod eam af Baiern ghoid, ums Land bessa z kristianisian. Zeascht woa a am Hof vom Herzog z Rengschburg, wo domois de Hauptstod vo Baiern gwesn is. Da Heazog hod se aa vo eam taffa lossn. Nacha is da Rupert in Baiern umadum groast und hod do predigt. Spada is a da easchte Bischof z Soizburg woan und da easchte Obt vom Stift St. Bäda.

Heit is da Ruperti da Schutzbatron vo Soizburg und vom Rupertiwinke. Nem da Maria Patrona Bavariae giit a owa aa ois da zwoate Landesbatron vo Bayern. Schutzbatron is a aa vom Soizbeagbau. Oatsbatron is a in St. Ruprecht an da Raab und St. Ruprecht ob Murau (oi zwoa in da Steiermoark), Šentrupert in Slowenien und im Stodtei St. Ruprecht in Klognfurt. Noch eam is aa as Rupertinum Musääum (modeane Kunst) z Soizburg benennt.

Da Ruperti wead oft mit an Soizfassl wiedagebm, wei a da Legendn nach de Solequejn entdeckt hod. Ea soi s mit sein Bischofstob zum entspringa brocht hom.

• 
  Okumpft af Soizburg
• 
  Woppn vo Guttaring (Karntn)
• 
  Da Hl. Ruperti mit an Soizfassl
• 
  Sankt Ruperti ois Kiragrinda