George Carlin

Si George Denis Patrick Carlin (Mayo 12, 1937 - Hunyo 22, 2008) sarong Amerikanong komedyante, aktor asin parasurat asin kritiko sosyal. Siya bantogan na maray sa lantad nin pelikula asin telebsiyon sa pagpangirit, sa pagtaong kaalingan sa mga paradalan asin paradangog paagi nin pagsuba, pagtuya-tuya, pag'olog-olog, pagtuyaw asin pagtaboga' sa mga institusyon kan Amerika, sa gawe-gawe pulitikal kan gobyerno, sa mga kinaugalean asin pagtubod na sa paghuna niya sobra naman asin dapat bakleon o bako man totoo o kalokohan sana. Mala ta siya daa mayong pagtubod sa Dios, sa anoman na relihiyon asin m akusog niyang liniliwat-liwat na an gobyerno Amerikano nagrororo' nanggad. Siya bistong gayo sa maisog asin hayag, daing turutumpi' na pagtaong opinion sa mga bagay-bagay.

Aram-aram siyang marhay kan publiko sa saiyang mga kaisipan sa pulitika, sa lenggwaheng Ingles, sikolohiya, relihiyon asin sa manlaenlaen na bagay na mga taboo, na habong dutaan kan kadaklan ta mga sensitibong isyu. Inapod kan sarong peryodiko si Carlin bilang "dekano kan mga komedyanteng kontra-kultura."^[1]

1. ↑ Norman, Michael (June 23, 2008). "George Carlin, counterculture comedians' dean, dies at 71". The Plain Dealer (Cleveland, Ohio). http://www.cleveland.com/people/index.ssf/2008/06/george_carlin_counterculture_c.html.  Kinua 12-01-14