Prinsipe William kan Wales

Si Prinsipe William kan Wales (namundag, William Arthur Philip Louis kan Hunyo 21, 1982) iyo an matuang aki ninda Charles, Prinsipe kan Wales, asin ni Diana, Prinsesa kan Wales. Siya man an ikatolong pinakamatuang makoapo ni Reyna Elizabeth II asin ni Prinsipe Philip, an Duke kan Edinburgh. Siya an ikaduwa sa linyada sa pagtukaw sa trono, sunod sa saiyang ama, sa kahadean kan 16 na independienteng estado, dawa totoo parati nag'eerok siya sa Reino Unido, an pinakagurang na estado sa kahadean na ini.

Siya nagkuang edukasyon sa apat na eskwelahan sa Reino Unido asin nagkamit nin titulo sa Unibersidad kan St. Andrews. Parte kan saiyang bakasyon sa pagklase pigkonsumo niya sa Tsile, Belize, asin sa ibang mga nasyon sa Aprika. Siya natoka bilang teniente sa Blues and Royals regiment kan Household Cavalry na kasabay niya an tugang niyang si Prinsipe Harry. Pakalihis duwang taon, natapos niya an training komo sarong piloto sa Royal Air Force College Cranwell. Kan 2009, si Prinsipe William nagbalyo sa Royal Air Force, nataas sa ranggong flight lieutenant asin nagtraining pagpalupad nin helikopter ngane magin lubos na propesyonal na piloto sa Search and Rescue Force. Kan Autumn 2010, natapos niya an inapod na generic and special-to-type helicopter training; ngonyan yaon na siya nakatoka sa RAF Valley sa squadron Nu. 22 bilang co-piloto sa Sea King search and rescue helicopter.

Kan Nobyembre 16, 2010 pigbantolin kan Clarence House na si Prinsipe William asin an saiyang haloy nang kailusyon, si Kate Middleton, kakasalon. Nabareta sunod na an seremonya nin pagkasal gigibohon sa Westminster Abbey sa Abril 29, 2011 alas onse nin aga.