San Tropez

San Tropez (Sant Tropetz) a zo ur ganaouenn saoznek savet, ton ha son, gant ar c'haner-sonaozer saoz Roger Waters e-unan-penn^[1].

Pedervet kanaouenn an albom Meddle gant Pink Floyd an hini eo, o tont war-lerc'h Fearless hag a-raok Seamus.
Jazzy he zon ez eo anavezet en abeg d'ar solo gitar kaset da benn gant David Gilmour a son e venveg o riklañ ur bottleneck^[2] ouzh ar c'herdin anezhañ ; ur solo piano gant Richard Wright a respont dezhañ en dibenn.

Ne oa ket dianav Sant Tropetz tamm ebet da izili 'zo eus Pink Floyd dre m'o devoa kanet Syd Barrett (1946-2006) ha David Gilmour e leurenn tavarnioù ar porzh bihan, e penn-kentañ ar bloavezhioù 1960 a-raok na vije savet ar strollad brudet. E San-Tropetz an hini eo ivez e voe dalc'het d'an 8 a viz Eost 1970 gant Pink Ployd ur sonadeg hag a reas berzh bras : skignet e voe e-barzh Pop 2, un abadenn skinwel c'hall kinniget gant Patrice Blanc-Francard (1942-).

• Prantad enrollañ : miz Gouere ha miz Eost 1971,
• Lec'hioù enrollañ : AIR Studios ha Morgan Studios e Londrez (Bro-Saoz),
• Padelezh : 3:40,
• Ti-embann-pladennoù : Harvest Records,
• Deiziadoù dont e-maez an albom : 30 a viz Here ( Stadoù-Unanet), 5 a viz Du 1971 ( Rouantelezh-Unanet),
• Albom : Meddle,
• Produour : Pink Floyd.

1. ↑ Diouzh boaz e veze kensavet an holl ganaouennoù gant ar strollad Pink Floyd a-bezh.
2. ↑ Un duelenn wer pe vetal peurliesañ hag a wisk unan eus bizied dorn kleiz (dehou) ur gitarour dehouiat (kleiziat). E riklañ a ra ar soner ouzh kerdin e venveg da gaout ur son metalek.