Aritmetica

El aritmetica es un elemental rama del matematica que ta estudia con el maga numerical operacion como el adicion, el sustraccion, el multiplicacion y el division. Na un mas amplio acepcion, ta inclui tambien ele con el potenciacion, el extraccion de maga raiz y el toma de maga logaritmo. Distinguible el maga aritmetico sistema basao na el tipo de numero na el que ta opera ellos. Restringio el entero aritmetica lang al maga calculacion con el maga positivo y negativo natural numero. Ta involucra el aritmetica del maga racional numero con el maga operacion na el maga fraccion que ta yace entre el maga entero. Ta inclui el aritmerica del maga real numero con el calculacion, y con el maga racional y con el maga irracional numero, y ta cubri con el entero real recta. Otro distincion basao na el sistema de numeracion empleao para realiza con maga calculacion. El decimal aritmetica el mas comun. Ta usa ele con el maga basico numero de 0 a 9 y el de ellos maga combinacion para expresa con el maga numero. El binario aritmetico, por el contrario, usao por el mayoria del maga computadora y ta representa con el maga numero como maga combinacion del maga basico numero 0 y 1. Ta opera cuanto aritmetico sistema na maga matematico objeto hinde numerico, como el aritmetica de maga intervalo y el aritmetica de maga matriz.

Ta forma el maga aritmetico operacion con el base de manada rama del matematica, como el algebra, el calculo y el estadistica. Ta juga ellos con un similar papel na el maga ciencia, como el fisica y el economia. Presente el aritmetica na manada aspecto del cotidiano vida, por ejemplo, para calcula con el cambio durante un compra o para maneja con el maga personal finanza. Es uno del mas temprano forma del matematico educacion que ta incuntra el maga estudiante. Ta estudia el psicologia y el filosofia con el maga cognitivo y conceptual fundacion del aritmetica.

Ta remonta a maga mil, y seguro maga decena de maga mil, año el practica del aritmetica. Ya inventa maga antiguo civilizacion, como el egipto y el sumerio, con maga sistema de numeracion para soluciona con maga practico aritmetico problema tan temprano como 3000 AEC. Empezando na el aca-7 y aca-6 maga siglo AEC, ya inicia el maga antiguo griego con un mas abstracto estudio del maga numero y ya introduci con el metodo de maga rigoroso demostracion. Ya desarrolla el maga antiguo indio con el concepto de cero y el indo-arabigo numeracion, que ya refina mas el maga arabigo matematico y ya difundi al occidente durante el Medio Edad. Inventao el maga primero mecanico calculadora durante el aca-17 siglo. Ya mostra el maga aca-18 y aca-19 siglo con el desarrollo del moderno teoria de maga numero y el formulacion del maga axiomatico fundacion del aritmetica. Durante el aca-20 siglo, ya revoluciona el aparicion del maga electronico calculadora y el maga computadora con el precision y el velocidad con el que realizable el maga aritmetico calculo.