Marignana

Marignana hè una cummuna di u dipartimentu di a Corsica suttana. Hè appesu u paese à a muntagna à un'altura media di 730 metri. Hè postu à circa 65 chilometri da Aiacciu, ind'un cantone chjamatu ufficialmente "Dui Sevi", ma u rughjone vene suvente chjamatu "Pumonte" da i so propii abitanti, puru chì u nome "Pumonte" possa insignà a Corsica suttana sana. Si trovanu dui paisoli annant'à i listessi tarreni cumunali : Chidazzu à 1,5 chilometri da Marignana, è Revinda luntanu circa 15 chilometri è chì suprania à Carghjese. Ci hè circa 70 abitanti d'invernu, chjamati i Marignanesi. A pupulazione cresce di solitu in fin'di sittimana, ma masimu durante e vacanze. Durante i mesi istatini, sì pò alzà a pupulazione à 500 parsone mentre uni pochi di ghjorni ma si mantene piuttostu intorn'à 300 abitanti di regula. U santu patrone di u paese hè San Ghjacumu, è a festa patrunale accade a prima duminicata dopu u 25 di lugliu, ghjornu di a San Ghjacumu. Ci hè dui caffè, un ustaria è una buttighella induv'ellu si pò truvà calchì roba da manghjà è a stampa più sparta.

Hè u paese di Versini Dumenicantone (Marignana 1872- Aiacciu 1950) dettu Maistrale, ch'hà cullaburatu à u ghjurnale A Muvra di Petru Rocca. Hè dinò quellu di u scrittore è pueta Ghjacumu Santu Versini (Marignana 1867 - Aiacciu 1922), fundadore incù Saveriu Paoli di a rivista A Cispra, è stututore di prufissione. Ci hè ancu natu Coppolani Savieru (Marignana 1866 - Mauritania 1905), cunquistadore pacificu di a Mauritania, è dopu u so amministratore.