Back Carrie (cinta de 1976) AN كاري (فيلم 1976) Arabic كارى (فيلم 1976) ARZ Кери (филм, 1976) Bulgarian Carrie (pel·lícula de 1976) Catalan Carrie Czech Кэрри (фильм, 1976) CV Carrie Welsh Carrie (film fra 1976) Danish Carrie – Des Satans jüngste Tochter German
|
C'l artìcul chè 'l è scrit in
Miranduléś |
 Carrie
| ||
| Carrie, lo sguardo di Satana | ||
 La Sissy Spacek in na figùra dal film | ||
| Carrie, l'uciàda 'd Sàtana 1976 | ||
|---|---|---|
| Regìa: Brian De Palma | ||
| Scritōr: Stephen King • Lawrence D. Cohen | ||
| Atōr: Sissy Spacek • Piper Laurie • Amy Irving Nancy Allen • John Travolta • William Katt Betty Buckley • P.J. Soles • Priscilla Pointer Sydney Lassick • Michael Talbott • Doug Cox | ||
| Müsica: Pino Donaggio | ||
| Léngua: Ingléś | ||
| Dürä dal film: 94 minüt | ||
| Nasiōṅ: Stat Unî | ||
Carrie, lo sguardo di Satana (Carrie, l'uciàda 'd Sàtana) 'l è 'n film dramàtic e ad scarésa dal 1976 ad Brian De Palma e 'l è trat, par la prima vòlta, da 'n rumànś ad Stephen King.
Al gh'à abû 'n séguit in dal 1999 da 'l tìtul Carrie 2: la furia.
Sunt
La Carrie White (Sissy Spacek) l'è na ragàsa tìmda ch'la fà 'l ùlt'm an dal scōli superióri: la fà fadìga a far-as di amìg parchè l'è sèmpar stada tgnuda a cà da sò màdar Margaret (Piper Laurie), una cun la fisa dla Cèsa Catòlica. Dòp na partìda ad vóley, méntar l'è drē a far-as na dócia, la gh'à al sò primi mestruasiòṅ e, a n savénd briśa quél ch'l éra drē a sucéd'r-ag, la rèsta lè squasàda dal tut, sóta al ridùdi dal sò cumpàgni ch'i la tōś'n in gir. Sōl la Sue (Amy Irving) la s tōś a cōr al sò caś, cunvinsénd al sò murōś Tommy Ross (William Katt) a 'nvidàr-la a 'l bal dal licèo.
In cal méntar la Carrie la capìs 'd èsar bòna ad mōv'r i quèi cun al pinsér e la dasfrùta cal putēr lè par far in manéra 'd andàr a 'l bal listés, anc cónt'r al vlēr ad cla dasciòldacrìst ad sò màdar. Ma ad nascòsc la Chris Hargenson (Nancy Allen) e al sò ragàs Billy Nolan (John Travolta) i s inśégnan par tiràr-'g un tragatèṅ dimóndi catìṿ. I vōlan difàti butàr-'g adòs un séć pîṅ ad sangṿ ad nimàl durànt al bal. E 'l è quél ch'a sucéd dabòṅ: méntar la Carrie l'è in sal palc par ricévar al prèmi dla còpia più bèla dla sira, in dal dè più bèl dla sò vita, la Chris la tira la lasa dal séć e la Carrie la s impinìs ad rós, pròpria méntar tuta la gint la taca a rìd'r ad lē, anc i prufesōr.
Vilìda e dastrùta ad dèntar, la Carrie la tira fóra tuta la sò arlìa e, druànd la sò telecinéśi, la i cópa tut. Turnàda a cà par lavàr-as, la gh'à da patìr anc la matéria ad sò màdar.
Arcgnusimènt
- Prèmi Òscar dal 1977:
- Nomination par la Sissy Spacek cuma mijóra atóra prutagunìsta
- Nomination par la Piper Laurie cuma mijóra atóra minga prutagunìsta
- Golden Globe dal 1977:
- Nomination par la Piper Laurie cuma mijóra atóra minga prutagunìsta
- Saturn Award dal 1977:
- Nomination cuma mijór film ad scarésa
- Fèstiva 'd Avoriaz dal 1977:
- Gran Prix
- NSFC Award a la Sissy Spacek