Back Two Evil Eyes German Two Evil Eyes English Two Evil Eyes Spanish دو چشم شیطانی Persian Deux Yeux maléfiques French Due occhi diabolici Italian マスターズ・オブ・ホラー/悪夢の狂宴 Japanese Two Evil Eyes Dutch Oczy Szatana Polish Two Evil Eyes Portuguese
|
C'l artìcul chè 'l è scrit in
Miranduléś |
 Two Evil Eyes
| ||
| Due occhi diabolici | ||
 La gata négra in na figùra dal film | ||
| Dū òć diabòlic 1990 | ||
|---|---|---|
| Regìa: George A. Romero • Dario Argento | ||
| Scritōr: Edgar Allan Poe • George A. Romero Dario Argento • Franco Ferrini | ||
| Atōr: Adrienne Barbeau • Harvey Keitel • Ramy Zada Madeleine Potter • Martin Balsam • John Amos Bingo O' Malley • Sally Kirkland • Holter Graham | ||
| Müsica: Pino Donaggio | ||
| Léngua: Ingléś | ||
| Dürä dal film: 115 minüt | ||
| Nasiōṅ: Stat Unî • Itàglia | ||
Due occhi diabolici (Dū òć diabòlic) 'l è 'n film ad scarésa a epiśòdi dal 1990 ad George A. Romero e ad Dario Argento. 'L è stâ girâ in di Stat Unî c'n un cast internasiunàl. La pelìcula la rénd umàǵ a 'l scritōr Edgar Allan Poe e i regìsta a 'l inìsi i gh'ìvan da èsar quàtar ma pò Wes Craven e John Carpenter i n aṅ briśa tòlt part a 'l prugèt.
Sunt
Prim epiśòdi: Fatti nella vita del signor Valdemar (regìa ad George A. Romero)
Al sgnōr Valdemar (Bingo O' Malley) al gh'à ssanta-sìnc an ma anc un muć ad bèsi tant che sò mujér, la Jessica (Adrienne Barbeau), la i vrév subìt sénsa spetàr incóra dimóndi. Insém a 'l dutōr Robert Hoffman (Ramy Zada) la trapèla ad far-al fóra ma prima a gh'è da preparàr al testamènt in sò favōr. A s fà càrag 'd ipnutiśàr-al par far-ag firmàr al carti ch'a gh vōl pròpria Robert ma in sal più bèl al vèć al mōr prima ch'al tragatèṅ al fus fat in fiṅ in fónd. P'r avér-ag soquànt dè par finìr al lavōr cun 'l avucàt, al dutōr al śēla 'l cadàv'r in cantìna.
Ma l'anma 'd Valdemar la n à mai bandunâ 'l còrp parchè 'l óm 'l è mòrt ch'l éra incóra ipnutiśâ. Chi lò acsè al s déśda p'r andàr a far-'g-la pagàr a sò mujér.
Secónd epiśòdi: Il gatto nero (regìa ad Dario Argento)
Roderick Usher (Harvey Keitel) par campàr al fà dal foto ad crònaca négra. 'L è dimóndi brâv in dal sò mistēr anc parchè al gh cata gust a tōr śò fat di ad sangṿ e di mòrt. P'r al sò ùltim prugèt al vōl far un lìb'r ad foto 'd un gat sevisiâ e al decìd ad druàr la gata négra dla sò muróśa, l’Annabel (Madeleine Potter), che fra 'l àtar a gh stà dimóndi in si maròṅ. Quànd la dóna la véd al lìbar, la gh mét tri secónd a capìr ch'la bèstia turturàda in dal paǵni d'l òpra dal sò muróś l'è pròpria la sò gata ch'l'è sparìda in cal méntar. L’Annabel la fà 'l valìś parchè la gh 'n à abàsta 'd lò ma la n fà minga in tèmp parchè Roderick al la scurtèla a mòrt quànd lì lē la s éra misa a diféndar 'n àtar gat négar ch'l éra capitâ da cla banda e ch'al risćiàva 'd finìr impicâ, na bèstia cun na màcia biànca adòs ch'la pâr un cavàstar. Par lugàr al cadàvar, Roderick al decìd ad muràr-la da drē da 'n mur ad cartòṅ-śés.