14 helpantoj en mizero

La 14 helpantoj en mizero (latine Quattuordecim auxiliatores) estas grupo de katolikaj sanktuloj, kiujn kredantoj en (specifaj) mizeroj alvokas por helpo. Ili estis ofte prezentitaj en figura arto. Troviĝas multaj pilgrimpreĝejoj kaj kapeloj konsekritaj al ili. La origino de la kredo estis ĉe la centra Rejnvalo en la 14-a jarcento, post la pesto, kiu poste nomiĝis Nigra morto.

Al la 14 helpantoj apartenas:

• Akazio

helpas kontraŭ mortotimo;

• Egidio

helpas kontraŭ epilepsio, mensmalsanoj, protektas brutojn;

• Barbara

helpas al mortantoj, kontraŭ fulmo kaj fajro;

• Blazio

helpas kontraŭ kolmalsanoj;

• Kristoforo

helpas kontraŭ nepreparita morto, savas de ajna danĝero;

• Ciriako

helpas kontraŭ tentoj en la horo de la morto;

• Denizo

helpas kontraŭ kapdoloroj;

• Erasmo

helpas kontraŭ ventrodoloro;

• Eŭstaĥo

helpas en malfacilaj situacioj de la vivo;

• Georgo

helpas kontraŭ malsanoj de dombestoj;

• Katarina

helpas kontraŭ langomalsanoj kaj parolproblemoj;

• Margareta

helpas al naskantoj;

• Pantaleono el Nikomedio

helpas al kuracistoj;

• Vito

helpas kontraŭ mensaj malsanoj kaj epilepsio.

Krom la festotago de ĉiu el la 14 helpantoj, la 8-a de aŭgusto nun estas konsiderata ilia komuna festotago.

Baziliko Vierzehnheiligen dediĉita al ĉiuj dek kvar sanktuloj situas apud la urbo Bad Staffelstein en Bavario, Germanio. Ĝi estis konstruita en la 18-a jarcento de la arkitekto Balthasar Neumann, altrangulo de la germana baroko, kiu ankaŭ estis la arkitekto de la Rezidejo de Würzburg.