Billie Jean

"Billie Jean" [BIli ĝin] estas ritmenblusa kanto de Michael Jackson, komponita por la albumo Thriller de 1983. Ĝi tiam estis la unue plej populara furorkanto en Usono dum naŭ semajnoj. Hodiaŭ ĝi restas vaste ludata kaj aŭskultata kantaĵo, kaj ofte figuras en listadoj de la "dek plej bonaj kantoj de ĉiuj epokoj" ks. Por multaj homoj ĝi iĝis La kanto de Michael Jackson.

Vendrede la 25-an de marto Jackson unuafoje montris sian "signaturan" dancon Lunpaŝadon (Moonwalk) kantante ĉi kanton ĉe festeno Motown 25. La spektaklo distribuiĝis televide (NBC) je la 16-a de majo.

"Billie Jean" estas markita de sia baza, "ŝtelira" ritmo kiun kelkaj muzikaj recenzistoj nomis "genia", kaj la hanta rekantaĵo pri la junulino Billie Jean:

Billie Jean is not my lover

She's just a girl who claims that I am the one

But the kid is not my son

"Billie Jean ne estas mia amantino / koramikino

Ŝi nur 'stas junulino kiu postulas ke mi estas Tiu [kiu kulpas]

Sed la ido ne estas mia filo"

La kanto do pritemas belegan Billie Jean (she was more like a beauty queen of a movie scene "ŝi estis pli simila al belecreĝino de filma sceno") kiu logas la kantiston kaj akuzas lin de patreco de ŝia fileto. Kaŭzo de ĝia furorego devas esti la temo, kiu tuŝis kaj ankoraŭ tuŝas multajn junulojn, kiam iom-post-iom evidentiĝis la pli negativaj aspektoj de la seksa revolucio de la 1960-oj kaj 1970-oj. La kanto pri kulpo/nekulpo estas paranoja inkubo kian bedaŭrinde multaj homoj spertis. Interese, virino en 2004 akuzis Jackson pri patreco de ŝia infano.