Kvorumsenso

En biologio, kvorumsenso estas kapablo sensi ĉelan denson kaj respondi al ĝi per gena esprimregulado. Ĝi estas speco de ĉela signalado, kaj specife interĉela signalado. Ĝi krome havas trajtojn de ĉela memsignalado, ĉar la ĉelo produktas kaj signalmolekulon kaj la ricevanton de tiu molekulo.^[1] Ekzemple, per kvorumsenso bakterioj povas limigi la esprimon de specifaj genoj al la altaj ĉeldensoj, kie la rezultaj fenotipoj estas plej avantaĝaj, kaj ne esprimi ilin en maldensaj kondiĉoj, kie ili estus senkompense kostaj.^[2] Multaj specioj de bakterioj uzas kvorumsenson.

Ekster ĉela biologio, oni povas nomi kvorumsenso la komunikmetodon per kiu iuj sociaj insektoj decidas kie fari neston. Ĝi ankaŭ estas utile aplikata en komputiloj kaj robotoj. Ĝenerale, kvorumsenso povas utili en iu ajn sencentra sistemo kies sistemeroj havas: (a) manieron nombri la sistemerojn kun kiuj ili interagas, kaj (b) norman kondutoŝanĝon kiam la nombro da sensitaj sistemeroj superas certan sojlon.

1. ↑ (11-a de septembro, 2019) “Quorum Sensing by Monocyte-Derived Populations”, Frontiers in Immunology 10 (2140), p. 2140. doi:10.3389/fimmu.2019.02140. 
2. ↑ (11-a de februaro, 2017) “Quorum-Sensing Signal-Response Systems in Gram-Negative Bacteria”, Nature Reviews Microbiology 14 (9), p. 576–588. doi:10.1038/nrmicro.2016.89.