Superheroi

Superheroia heroi klasiokoen gaitasunak gainditzen dituen fikziozko pertsonaia da, orokorrean gizakiaren gaitasunetatik haratago dauden super-botereak ditu. Mozorrotuta joan ohi da bere nortasuna ezkutatzeko, eta heroiaren paperean sartzen da. Normalean, bere botereak erabiltzen ditu mundua leku hobea izan dadin laguntzeko, edo publikoa babesten eta krimenaren aurka borrokatzen du. Superheroien fikzioa da pertsonaia mota horietan zentratzen den fikzio generoa, bereziki, 1930eko hamarkadaz geroztik, komiki estatubatuarretan (eta geroago Hollywoodeko filmetan, zinema sailetan, telebistan eta bideojokoetan), baita Japoniako hedabideetan ere (kamishibai, tokusatsu, manga, anime eta bideojokoak barne).

Jatorri eta aurrekari askotarikoak dituzte superheroiek. Superheroi batzuek (adibidez, Batman eta Iron Man) sortzen eta erabiltzen duten teknologia aurreratutik eratortzen dute beren estatusa; beste batzuek (Superman eta Spiderman, adibidez) gizakiaz gaindiko biologia dute, edo magia erabili eta praktikatzen dute beren trebetasunak lortzeko (Marvel kapitaina eta Doctor Strange, adibidez)^[1][2][3]. Batzuetan, «krimenaren aurkako borrokalari maskaratuak», «abenturazale mozorrotuak» edo «zaindari maskaratuak» bezalako terminoak erabiltzen dira Spirit bezalako pertsonaiak aipatzeko, esplizituki superheroi deitzen ez direnak, baina antzeko ezaugarriak partekatzen dituztenak.

Superheroi batzuek beren botereak erabiltzen dituzte eguneroko delinkuentziaren aurka borrokatzeko eta, aldi berean, superbilauek gizateriaren aurka egiten dituzten mehatxuei aurre egiteko; izan ere, superbilauak dira haien homologo kriminalak. Sarritan, superbilau horietako bat, gutxienez, superheroiaren artxietsaia edo nemesia izaten da. Superbilau ezagun batzuk behin eta berriro agertzen dira sailetan, euren gaitasunak direla eta.

1. ↑ (Ingelesez) «‘V for Vendetta’ is S for Subversive» LJWorld.com (Noiz kontsultatua: 2024-10-01).
2. ↑ Gresh, Lois H.; Weinberg, Robert E.. (2002). The science of superheroes. Wiley ISBN 978-0-471-02460-6. (Noiz kontsultatua: 2024-10-01).
3. ↑ «THE DARK KNIGHT» web.archive.org 2014-11-07 (Noiz kontsultatua: 2024-10-01).