Catarine Percude

Catarine Percude (it. Caterina Percoto, San Lurinç di Solescjan, Manzan, Udin 1812 - Manzan, 1887) e je stade une des plui famosis scritoris furlanis.

Di famee nobil, tal 1844 e veve tacât a scrivi sul gjornâl "Favilla" sei furlan sei par talian, denant dome cun critichis di altris oparis, daspò scrivint novelis. Lis sôs oparis plui cognossudis a son "L'anno della fame", "L'album della suocera", "Il bastone", "Il contrabbando", "Il Licôf", "La malata", "Il refrattario"; e je ancje autore di vincj novelis dats dongje tal volum "Scritti friulani". La sô maniere di contâ cjape un pôc di Alessandro Manzoni (soredut intai principis morâi) e intal stes timp e ven denant di Verga. Dopre un lengaç fresc e sut dal sô mont furlan. Secont un grum di critics leteraris dal dì di vuê, lis sôs contis sui contadins dal Friûl dal XIX secul a presentin descrizions ogjetivis e realistichis, che nus puedin fâ imagjinâ la vite di chei timps e che no si cjatin in tantis altris oparis di chel timp.

E je sepulide a Udin dongje di Pieri Çorut.